Biglaan

Biglaan

di ko inaasahan

agad-agad na lang

diwa ko’y nahibang

 

Biglaan

puso’y nahiwagaan

utak ay di na maituwid

kaluluwa’y tila tumagilid

 

Biglaan

akalain mo ba naman

nakakapanibago, nakakakilig

ang biglaang pagdapo ng pag-ibig

Akala Ko Matapang Ako

Akala ko matapang ako

noong nagpalit ako ng kurso

noong iniwan ko ang permanenteng trabaho

noong tumaya ako sa mga di sigurado

 

Akala ko matapang ako

handang makipagpalitan ng argumento

handang ibulalas ang opinyon ko

handang ihayag ang aking punto por punto

 

Akala ko matapang ako

ngunit may pagkakataong ganito

na sa iyo’y magpapabago

at maduduwag ang matapang na puso

 

Akala ko matapang ako

ngunit hindi sa mga sandaling ito

di ko kayang tumbasan ang tapang mo

di ko alam kung bakit tapang ko’y naglaho

Paksa

Paano ba ang maging isang paksa?

Iyong ikaw mismo ang aalayan ng tula

Di ko na hahangarin ang sagot ng iba

Sapagkat, alam ko na, alam ko na.